Koreng'ana n’oroboti rw'oboringoria korwa ase abamanyi b’amang'ana, omonwa bw'ekegusii nigo ore ase okogosererigwa kwogochia gosira ase emiaka emeke ere bosio. Aya kobwatekana n'abagusii abanyene, kogokera emenwa ya isiko naboigo gosegeta abana babo komanya emenwa eyio goetania ekegusii.
Ase amakiaya, abana bamenyete ase ebinyoro bierisabu, nigo bakonoga egeswaeri n’ekengeresa rika ri’ekegusii. Mbuya titogokana buna emenwa yende ya isiko teri y’eng’encho korende, titogwenereti kweba na koombia ekegusii. Obo nabwo oboroso bwaito, omonwa o baba.
Oyobete omorai bwense ya Afrika ya Irianyi (South Africa), ekoring’a Nelson Mandela, nigo abinerete buna, “ekero omonto agokwanera oyonde ase omonwa asomerete, nigo akoigwera amato, korende ekero akomokwanera ase omonwa bw’ororera, rirorio nigo akomanyera enkoro”. Oko nogokuurera arwete gochia ase abanto abamwamu b’orogongo rwa Afrika ase rwabeta, buna ntogwenerete gotatera na “kobeka kwaa” emenwa yaito y’egenka.
Okoboria kwane gochia ase abaibori: abababa n’abatata, k’abana baino bare ase omotimoko omotambe bw’omoerio bw’omochanana (omwaka), tema ase mokonyara kobakwanera ase omonwa bw’ekegusii, tiga toraombia emenwa ya isiko ake.
Engaki yokobaragera (kobabanga) emeremo ebatungetie ase chinka, bakwanere ase ekegusii ekiere. Onye tibakomanya omonwa oito, rirorio Chiradio nechi tv chiekegusii nigo chirachie koborwa abararia ase amatuko aankio. Komoranche reera na korera ekegusii giaito, omwando bwe chisokoro ne chisokororia chiaito.
Abange mbatebe buna ekegusii tikeri kia ng’encho, tiga ngokanie okwo nokweng’aina ase emetwe yaino. Ekegusii n’ekieng’encho enene gochia ase omogusii. Eke n’ekemanyererio giaito yaani (identity). Kwana ekegusii ase risango ribe chikanisa, chibarasa, emesangererekano ase chisabaye (chisukuru), ase amatanga onye aya onsi kogokorekanera gusii. Timosoka konoga ekegusii.
Rigereria, omosubati Hulda Momanyi omoiborwa bw’eriraba ria Gusii ekaonti Nyamira oyio boigo ochorire ase oborai ime yense ya Amerika, nigo amanyete gokwana ekegusii buya. Onye ndiria atamanyeti gokwana omonwa oyo, nchera ki rende aranyare gokwanera abanto ba sobo ekero airanire Kenya kobakwania? Obo nabwo obuya bwokomanya omonwa bw’egenka nomenya chinse chia maiko.
Tiga mbeke timo ase ogoteba buna, Ekegusii nigo kegendererete kogubwa n’emenwa y’abanyanda mbariri ng’ora ng’ora, giachiire echii na bwango iga ngotweka kere mo onye titokoba maiso. Ira egetambokero kigotooria omonwa oito.